Erfahrungsbericht von Wotan neu Valentino aus Ungarn

Valentino 🤍 

âme soeur - soulmate

[someone with whom one has a special connection) 

07.01.21; Sit dem Tag wo du ih mis Lebe trette bisch, hesch du mir eh chlini Ewigkeit gschenkt. 

67 Täg töned nach so wenig aber wenn ich uf alles zrugluege, was mir bereits mitenand gmeisteret, duregstande und erlebt hend, denn fühlts sich‘s so ah, als wärsch scho sit Ewigkeite ah minere Site. 

Ich weiss no ah dem eine Abig, wo ich dis Bild uf de Homepage bim durescrolle gseh han und ich sofort gwüsst han „das isch er“, obwohl ich detzumal gar kein Hund plant gha han und au nöd uf de „Suechi“ gsi bin. 

Aber ich weiss hüt, dass mir eus beidi usgsuecht hend und wenn du nur wüsstisch Valentino, wie fest ich dich scho gliebt han, bevor ich dich überhaupt kennt, -geschweige denn gseh han.. 

Du eroberisch mis Herz jede Tag uf‘s Neue und das ih Rekordzite. Sit ich dich da bi mir han, isch wohl chum en Tag vergange, wo du‘s nöd gschafft hesch, mir mit dim verspielte, tollpatschige, herzensguete und zitglich so ruhige Wese, es Lächle ufd Lippe zaubere.

Mir isch no nie so eh reini Seele wie du begegnet Valentino, du muesch eifach vo irgendwelchne Engel cho. 

Ich wür so gern all‘ das artikuliere, was dich beschriebt demit ich all dene Mensche da usse ufzeige chönt, was du (für mich) bisch aber ich bin mir gwüss, dass mer dich erlebe muen um all das chöne nahzvollzieh. 

Es git no so vieles da usse wo ich dir wott zeige Valentino, so vieli Stränd, so vieli Bergspitzene und so vieli Sunne Uf, - und Untergäng. 

De Valentino isch wie heicho, wie all die schöne Summernächt, min ruhige Hafe und mis „blib no paar Minute“. 

Danke ah dere Stell ah sganze Team vo animal-happyend, eues ganze Engagement und all die schöne Happy-ends, wo dank und dur eu erstönd! 

Ich wünsch mir für jede Mensch da use en Valentino, demit uf dere Welt chli meh Sunnestrahle ih eusi Herze gheie chönd. 

Mir sind vlt. diejenige wo all die Hünd „befreied“ aber schlussendlich sind dHünd die, wo eus rettet 🤍